Պարոն Նիկողոսին Հաւիկը
Ամէն տարի մեծ Զատիկը երբ մօտենար, Պարոն Նիկողոս կ’ուրախանա՜ր, իսկ հաւիկը կը բարկանա՜ր…:
Պարոն Նիկողոսին Հաւիկը
Ամէն տարի մեծ Զատիկը երբ մօտենար, Պարոն Նիկողոս կ’ուրախանա՜ր:
Մեծ սակառով, հրճուանքով հաւնոց կը մտնէր, բոլո՜ր հաւկիթները ուշադրութեամբ կը հաւաքէր, տուն կը տանէր,
մեծ կաթսայով կը խաշէ՜ր, սոխի կեղեւով կը ներկէր:
Ամէն տարի, մե՜ծ Զատիկը երբ մօտենար, Պարոն Նիկողոս կ’ուրախանա՜ր, իսկ հաւիկը կը բարկանա՜ր:
Հաւնոցին մէջ կ’երթա՜ր, կու գա՜ր, կը կտկտար:
Չէ՞ որ բադիկն ալ հաւկիթ կ’ածէր, սագիկը, հնդկահաւը, ինչո՞ւ միայն ի՛ր հաւկիթները…:
Չէ՞ որ կրիան ալ հաւկիթ կ’ածէր, օ՛ձը, երկա՜ր պոչով կոկորդիլոսը. ինչո՞ւ միմիայն ի՛ր հաւկիթները…:
Եւ տակաւին՝ կարապը, բուն, ջայլամը եւ բոլո՜ր միւս թռչունները…:
Ամէն տարի, մե՜ծ Զատիկը երբ մօտենար, Պարոն Նիկողոս կ’ուրախանա՜ր, իսկ հաւիկը կը բարկանա՜ր, հաւնոցին մէջ կ’երթար, կու գար, կը կտկտար:
– Կըտ կըտ կըտաաա՜ք,
Հաւկիթներս կու տա՜ք…: